Pahibalo Bisaya

Tuesday, March 13, 2007

Rakrakan na!

Kahigalaan,
Dunay umaabot nga pasinati sa pagsulat og kantang bisrock. Karong liwas sa semana santa ipahigayon. Adto gihapon sa balaknong dapit sa Mountain View Resort sa bukid sa Lahug. Kon dili sumpaki sa akong sked, posible nga adto sad ko mamagdoy kuyog sa bisdak nga mga rakista.
Nag-unang tukion ang kabahin sa poetic sensibilities sa pagsulat og lirikong bisrock. Gipaabot nga mamulong niini silas Eping (sa Ambassador), Insoy (sa Missing Felimon), si Myke O. (magbabalak bisdak), si Pul Cañada (sa Zzubo Studio, ang nag-mix sa mga kantang sulod sa duha ka album sa Missing Felimon), ug si Zarah Smith sa Handuraw.
Rakrakan na!
Bay Tomas

Monday, March 12, 2007

Pagsinati Sa Batadilang Binisaya

Kahigalaan,
Akong ipahibawo kaninyong tanan nga karong Pebrero 22 hangtod sa 23,
ipahigayon sa Mindanao State University-Iligan Institute of
Technology ang usa ka pasinati alang sa hustong pagtitik sa
pinulongang Binisaya.

Kining maong kalihokan ubos sa pagpasiugda sa Bathalad-Mindanao ug
gipaluyohan sa Komisyon sa Wikang Filipino nga gitimonan karon ni
Komisyoner Dr. Ricardo Ma. Duran Nolasco.

Tungod niini, gidapit ang tanang magsusulat, editor, katilingbang
Bisaya nga may interes ning maong hilisgotan sa pagtambong niini.

Lakip sa motambong ning maong katigoman isip lecturer si Bisaya
Associate Editor Edgar Saldaña Godin, Pamuno sa Bathalad-Mindanao
Eufemio Flores, ug uban pang kadagkoan sa Akademyang Bisaya.

Gawas sa sesyon plenarya, aduna usahay nga kulturanhong dalit ang mga
tinun-an sa nagkalainlaing tulunghaan isip lamas sa kalihokan. Mga
mag-aawit ug uban pang kasangahan sa arteng Bisaya magpakita sab sa
ilang sura.

Ayaw saypa ang pagtambong...

Tomas

2007.02.21

Palanca

Kahigalaan,

Nanawat na karon og salmot ang Don Carlos Palanca Memorial Awards for Literature. Sama sa gihapon, wala nausab sa nangaging batakan sa pagsalmot gawas lang sa tema sa Kabataan Essay (Tagalog Ug Iningles). Abli gihapon kini sa rehiyonal nga mga pinulongan sama sa Sinugboanong Binisaya, Hiligaynon, Iluko. Hangtod lang sa Abril 30 ang pagpanawat og salmot.

Sa samang paagi, ang Talaang Ginto (Collantes Award) nanawat na usab og salmot alang sa ilang tinuig nga tigi ilawom sa pagpaluyo sa Komisyon sa Wikang Filipino.

Kining ubos ninyong higala mosuway na usab og panimpalad. Hinaot nga atong paluyohan ang tinguha sa mga sektor nga palamboon ang literatura sa nasod.

Bay Tomas


2007.02.17